ស៊ីម សេនាជាតិ

ប្រធាននាយកប្រតិបត្តិ

លោក ស៊ីម សេនាជាតិ បានបញ្ចប់ការសិក្សាថ្នាក់បរិញ្ញាបត្រជាន់ខ្ពស់ ផ្នែកគ្រប់គ្រងអាជីវកម្ម និងបញ្ចប់ការសិក្សាផ្នែកគណនេយ្យ និងហិរញ្ញវត្ថុក្នុងឆ្នាំ ១៩៩៤ ។ ចាប់តាំងពីឆ្នាំ ១៩៩៥ មក លោកបានចូលរួមវគ្គបណ្តុះបណ្តាលជាច្រើន ពាក់ពន្ធ័ និងការគ្រប់គ្រង និងប្រតិបត្តិការមីក្រូហិរញ្ញវត្ថុ ។ លោកក៏ត្រូវបានទទួលស្គាល់ជាគ្រូបង្គោលមីក្រូហិរញ្ញវត្ថុដោយ ADBI និង TDLC របស់ធានាគារពិភពលោក និង UNCDF ។
លោកធ្លាប់បានធ្វើការងារជាច្រើនក្នុងវិស័យធនាគារ និងបានចាប់ផ្តើមបំពេញការងារជាមួយប្រាសាក់ចាប់តាំងពីឆ្នាំ ១៩៩៥ ក្នុងតួនាទីជាមន្ត្រីឥណទាន និងត្រូវបានតំឡើងឋានៈ ក្នុងមុខតំណែងផ្សេងៗជាច្រើន ដូចជា គណនេយ្យករ នាយកសាខា គ្រូបង្គោលផ្នែកកម្មវិធី MB អ្នកត្រួតពិនិត្យ និងនាយកហិរញ្ញវត្ថុ ។ ចាប់ពីពាក់កណ្តាលឆ្នាំ ២០០២ មកលោកបម្រើការងារក្នុងតួនាទីជានាយសាខា នាយកប្រតិបត្តិការ និងជាអនុប្រធាននាយកប្រតិបត្តិនៅគ្រឹះស្ថានមួយផ្សេងទៀត មុននឹងចូលមកបម្រើការងារ ជាប្រធាននាយកប្រតិបត្តិគ្រឹះស្ថានមីក្រូហិរញ្ញវត្ថុប្រាសាក់នៅចុងឆ្នាំ ២០០៣ រហូតមកដល់ដើមឆ្នាំ ២០២២។
បច្ចុប្បន្នលោកមានតួនាទីជាអភិបាល និងជាប្រធាននាយកប្រតិបត្តិគ្រឹះស្ថានមីក្រូហិរញ្ញវត្ថុ ហ្វឺស ហ្វាយនែន ។

ជា ហាង

អនុប្រធាននាយកប្រតិបត្តិ

លោក ជា ហាង បានបញ្ចប់បរិញ្ញាបត្រជាន់ខ្ពស់ផ្នែកគ្រប់គ្រងអាជីវកម្ម និងបញ្ចប់ថ្នាក់បរិញ្ញាបត្រគណនេយ្យ និងហិរញ្ញវត្ថុ។ លោកមានបទពិសោធន៍ជាច្រើនខាងផ្នែកហិរញ្ញវត្ថុ គណនេយ្យ លទ្ធកម្ម ការគ្រប់គ្រងធនធានមនុស្ស ឥណទាន សេវាធនាគារ គោលនយោបាយអង្គភាព ច្បាប់ អភិបាលកិច្ចអាជីវកម្ម យុទ្ធសាស្ត្រអាជីវកម្ម ផែនការអាជីវកម្ម និងការគ្រប់គ្រងគម្រោង ។
លោកធ្លាប់បានបម្រើការងារក្នុងតួនាទីជាច្រើន ដូចជាប្រធានផ្នែកហិរញ្ញវត្ថុ និងរដ្ឋបាល អ្នកប្រឹក្សាជាន់ខ្ពស់ផ្នែកលទ្ធកម្មហិរញ្ញវត្ថុ និងរដ្ឋបាល ប្រធានក្រុមប្រឹក្សាភិបាលរបស់ គ្រឹះស្ថានមីក្រូហិរញ្ញវត្ថុប្រាសាក់ នាយកប្រតិបត្តិ និងប្រធាននាយកដ្ឋានជាន់ខ្ពស់ផ្នែកយុទ្ធសាស្ត្រ និងផែនការអាជីវកម្ម ហើយលោកត្រូវបានតម្លើងតំណែង ជាប្រធាននាយកប្រតិបត្តិទទួលបន្ទុកផ្នែកយុទ្ធសាស្ត្រ និងផែនការអាជីវកម្ម។ លោកក៏ជាប្រធានក្រុមប្រឹក្សាភិបាលរបស់ក្រុមហ៊ុនបុគ្គលិកប្រាសាក់ (PSCo) និង ជាប្រធានក្រុមប្រឹក្សាភិបាលរបស់បរធនបាលកិច្ចហិរញ្ញវត្ថុប្រាសាក់ ។
បច្ចុប្បន្នលោកកាន់តួនាទីជាអនុប្រធាននាយកប្រតិបត្តិ និងជាអភិបាលរបស់គ្រឹះស្ថានមីក្រូហិរញ្ញវត្ថុ ហ្វឺស ហ្វាយនែន ។

នាង សុខឃីម

នាយកប្រតិបត្តិគ្រប់គ្រងហានិភ័យ

លោក នាង សុខឃីម បានបញ្ចប់ការសិក្សាថ្នាក់ បរិញ្ញាបត្រជាន់ខ្ពស់ផ្នែកគ្រប់គ្រង និងជាគ្រូបង្គោល មីក្រូហិរញ្ញវត្ថុ ដែលទទួលស្គាល់ដោយ ADBI, TLDC របស់ធនាគារពិភពលោក និង UNCDF ។ លោកបានបញ្ចប់ថ្នាក់បរិញ្ញាបត្រវិទ្យាសាស្ត្រក្សេត្យសាស្ត្រនៅឆ្នាំ ១៩៩៧ ។ លោកបានចូលរួមវគ្គបណ្តុះបណ្តាលជាច្រើន ទាក់ទងនឹងប្រតិបត្តិការមីក្រូហិរញ្ញវត្ថុ និងវគ្គបណ្តុះបណ្តាលផ្សេងៗទៀតផងដែរ។ លោកមានបទពិសោធន៍ច្រើនជាង ២០ឆ្នាំ ក្នុងវិស័យមីក្រូហិរញ្ញវត្ថុ ដោយចាប់ផ្តើមពីតួនាទីជាមន្ត្រីឥណទាន ក្នុងឆ្នាំ ១៩៩៨ ហើយត្រូវបានដំឡើងតួនាទីជាបន្តបន្ទាប់ ជាសវនករផ្ទៃក្នុង សវនករផ្ទៃក្នុងជាន់ខ្ពស់ នាយករងប្រតិបត្តិការ នាយករងឥណទាន និងជានាយកឥណទាន ។ លោកត្រូវបានដំឡើងតួនាទី ជានាយកប្រតិបត្តិទទួលបន្ទុកអាជីវកម្មចាប់តាំងពីឆ្នំា ២០១០ រហូតមកដល់ដើមឆ្នាំ ២០២២។ បច្ចុប្បន្ននេះ លោកមានតួនាទីជានាយកប្រត្តិបត្តិគ្រប់គ្រងហានិភ័យ នៃគ្រឹះស្ថានមីក្រូហិរញ្ញវត្ថុ ហ្វឺស ហ្វាយនែន។

យ៉ាង គឹមស្រេង

នាយកប្រតិបត្តិគ្រប់គ្រងហិរញ្ញវត្ថុ

លោក យ៉ាង គឹមស្រេង បានបញ្ចប់បរិញ្ញាបត្រជាន់ខ្ពស់ផ្នែកគ្រប់គ្រងអាជីវកម្មឯកទេសធនាគារ និងហិរញ្ញវត្ថុ និងបានបញ្ចប់ថ្នាក់បរិញ្ញាបត្រគណនេយ្យ និងបញ្ចប់ការសិក្សា ថ្នាក់ប្រកាសនីយបត្រជាន់ខ្ពស់បច្ចេកទេសធនាគារ ។ លោកមានបទពិសោធន៍ ច្រើនឆ្នាំក្នុងផ្នែកហិរញ្ញវត្ថុ គណនេយ្យ ហិរញ្ញកិច្ច លទ្ធកម្ម និងសេវាកម្មធនាគារ។ លោកបានចូលរួមក្នុងវគ្គបណ្តុះបណ្តាលជាច្រើន ដែលទាក់ទងនឹងវិស័យមីក្រូហិរញ្ញវត្ថុទាំងនៅក្នុងស្រុក និងអន្តរជាតិ ទាំងតំបន់អាស៊ី និងអឺរ៉ុប។ លោកមានបទពិសោធន៍ច្រើនជាង ២៣ឆ្នាំ នៅក្នុងវិស័យធនាគារ និងមីក្រូហិរញ្ញវត្ថុ ។ លោកបានចំណាយពេលជាង ១៦ឆ្នាំ ក្នុងតួនាទីជាមន្ត្រីជាន់ខ្ពស់ ។ លោកចាប់ផ្តើមពីតួនាទីជាគណនេយ្យករនៅប្រាសាក់ ក្នុងឆ្នាំ ១៩៩៨ ហើយត្រូវបានតំឡើងតំណែងជាបន្តបន្ទាប់ ពីប្រធានគណនេយ្យ ប្រធានផ្នែកគាំទ្រមីក្រូប៊ែងឃឺ អនុប្រធាននាយកដ្ឋានហិរញ្ញវត្ថុ នាយកនាយកដ្ឋានហិរញ្ញវត្ថុ ។ លោកត្រូវបានដំឡើងតួនាទី ជានាយកជាន់ខ្ពស់នាយកដ្ឋានហិរញ្ញវត្ថុ ចាប់ពីឆ្នាំ២០១៧ ដល់ដើមឆ្នាំ ២០២២ ។ បច្ចុប្បន្នលោកកាន់តួនាទីជានាយកប្រតិបត្តិគ្រប់គ្រងហិរញ្ញវត្ថុ នៃគ្រឹះស្ថានមីក្រូហិរញ្ញវត្ថុ ហ្វឺស ហ្វាយនែន ។

សាយ សូនី

នាយកប្រតិបត្តិគ្រប់គ្រងទីផ្សារ

លោក សាយ សូនី បានបញ្ចប់ការសិក្សាថ្នាក់បរិញ្ញាបត្រជាន់ខ្ពស់ផ្នែកគ្រប់គ្រងអាជីវកម្ម និងជាគ្រូបង្គោលមីក្រូហិរញ្ញវត្ថុ ដែលទទួលស្គាល់ដោយ ADBI, TLDC របស់ធនាគារពិភពលោក និង UNCDF ។ លោកក៏បានបញ្ចប់ថ្នាក់បរិញ្ញាបត្រគ្រប់គ្រងទីផ្សារ ហើយលោកបានចូលរួមវគ្គបណ្តុះបណ្តាលជាច្រើនទាំងនៅតំបន់អាស៊ី និងអឺរ៉ុបទាក់ទងនឹងប្រតិបត្តិការមីក្រូហិរញ្ញវត្ថុ ការអភិវឌ្ឍផលិតផល ការគ្រប់គ្រងអតិថិជន និងការគ្រប់គ្រងទីផ្សារ ។ លោកមានបទពិសោធន៍ជាង ២០ឆ្នាំ លើការគ្រប់គ្រងគម្រោង ការគ្រប់គ្រងទីផ្សារ ការអភិវឌ្ឍន៍ ផលិតផល និងការគ្រប់គ្រងទាំងក្នុងវិស័យឯកជន ការងារសង្គម និងមីក្រូហិរញ្ញវត្ថុ ។ លោកបានចូលរួមបម្រើការងារនៅប្រាសាក់ក្នុងដើមឆ្នាំ ២០០៥ ក្នុងតួនាទីជាប្រធានផ្នែកទីផ្សារ និងត្រូវបានតំឡើងតួនាទីជានាយកគ្រប់គ្រងទីផ្សារ ក្នុងឆ្នាំ ២០០៧ ។ លោកត្រូវបានតំឡើងតួនាទីជានាយកប្រតិបត្តិទទួលបន្ទុកទីផ្សារ ចាប់ពីឆ្នាំ ២០១០ រហូតមកដល់ដើមឆ្នាំ ២០២២ ។ បច្ចុប្បន្នលោកកាន់តួនាទីជានាយកប្រតិបត្តិគ្រប់គ្រងទីផ្សារ នៃគ្រឹះស្ថាន មីក្រូហិរញ្ញវត្ថុ ហ្វឺស ហ្វាយនែន ។

ជួប វាសនា

នាយកប្រតិបត្តិគ្រប់គ្រងប្រតិបត្តិការ

លោក ជួប វាសនា បានបញ្ចប់ថ្នាក់បរិញ្ញាបត្រជាន់ខ្ពស់ផ្នែកគ្រប់គ្រងអាជីវកម្ម និងបរិញ្ញាបត្រសេដ្ឋកិច្ច ឯកទេសហិរញ្ញវត្ថុ និងធនាគារ ។ លោកបានចូលរួមវគ្គបណ្តុះបណ្តាលជាច្រើន ទាក់ទងនឹងការអភិវឌ្ឍន៍ជំនាញមីក្រូហិរញ្ញវត្ថុទាំងក្នុង និងក្រៅប្រទេស ។ លោកមានបទពិសោធន៍ជាង ២០ ឆ្នាំ ក្នុងវិស័យធនាគារ និងមីក្រូហិរញ្ញវត្ថុ ។ លោកបានចូលរួមបម្រើការងារនៅប្រាសាក់ក្នុងឆ្នាំ ២០០២ ក្នុងតួនាទីជាមន្ត្រីឥណទាន ។ ជាបន្តបន្ទាប់ លោកត្រូវបានតំឡើងតួនាទី ជានាយកអនុសាខា នាយកសាខា និងជាប្រធានផ្នែកឥណទាន ។ ក្នុងឆ្នាំ ២០១០ លោកត្រូវបានដំឡើងតួនាទីជានាយកនាយកដ្ឋានគ្រប់គ្រង និងអភិវឌ្ឍផលិតផល។ លោកត្រូវបានតំឡើងតួនាទី ជាអនុប្រធាននាយកប្រតិបត្តិទទួលបន្ទុកធនធានមនុស្ស ចាប់ពីឆ្នាំ ២០២០ រហូតមកទល់ដើមឆ្នាំ ២០២២ ។ បច្ចុប្បន្នលោកកាន់តួនាទី ជានាយកប្រតិបត្តិគ្រប់គ្រងប្រតិបត្តិការនៃគ្រឹះស្ថានមីក្រូហិរញ្ញវត្ថុ ហ្វឺស ហ្វាយនែន ។