អ្នកកំពុងពិចារណាក្នុងការដាំដើមឈើជុំវិញផ្ទះ ប៉ុន្តែពុំទាន់ច្បាស់ថាការចំណាយថវិកា និងពេលវេលានោះវានឹងបានផលប្រយោជន៍អ្វីមកវិញដែរឬទេ នេះប្រហែលជាអ្នកមិនបានដឹងពីអត្ថប្រយោជន៍ដ៏ច្រើនដែលផ្តល់ដោយដើមឈើ។ ការដាំដើមឈើជុំវិញផ្ទះមិនមែនគ្រាន់តែធ្វើអោយផ្ទះរបស់អ្នកកាន់តែមានសោភ័ណភាពល្អនោះទេ ថែមទាំងផ្តល់អត្ថប្រយោជន៍ដ៏ច្រើនសន្ធឹកសន្ធាប់ទាំងខាងផ្នែកហិរញ្ញវត្ថុ ក៏ដូចជាការរស់នៅប្រចាំថ្ងៃដែលលោកអ្នកនឹកស្មានមិនដល់។

ខាងក្រោមនេះជាអត្ថប្រយោជន៍ដ៏ល្អបំផុត ៦ យ៉ាងក្នុងការដាំដើមឈើជុំវិញផ្ទះ៖

១ កាត់បន្ថយសម្លេងរំខាន

ប្រសិនបើអ្នករស់នៅតំបន់ដែលមានការធ្វើចរាចរទៅវិញទៅមកច្រើន ឬក្នុងទីក្រុងដែលពោរពេញទៅដោយសម្លេងរំខាន ពិតណាស់ដើមឈើអាចជួយអោយជីវិតរបស់អ្នកប្រសើរឡើងបានដោយវាអាចកាត់បន្ថយរាល់សម្លេងរំខានទាំងនោះបានខ្លះដែរ។ ក្នុងតួនាទីជាឧបករណ៍កាត់បន្ថយសម្លេងតាមបែបធម្មជាតិ ដើមឈើអាចបាំងរាំងរាល់សម្លេងរំខាន និងជួយអោយផ្ទះរបស់អ្នកមានសភាពស្ងប់សុខ និងស្ងប់ស្ងាត់។ ម្ចាស់ផ្ទះខ្លះបានរកឃើញថាការរារាំងសម្លេងរំខានដែលបានមកពីដើមឈើជួយអោយពួកគេអាចទទួលបានអារម្មណ៍ល្អនៅសួនមុខផ្ទះដោយពុំមានសម្លេងរំខាន និងភាពស្មុគស្មាញដែលបណ្តាលមកពីសម្លេងតាមដងផ្លូវដែលមានឡានម៉ូតូធ្វើដំណើរទៅវិញទៅមកនោះទេ។

២ ជួយអោយផ្ទះមានសភាពត្រជាក់រហឹមនៅរដូវក្តៅ

ដើមឈើដែលដាំជិតជុំវិញផ្ទះវាបានជួយកាត់បន្ថយកម្តៅ និងផ្តល់ជាម្លប់ត្រជាក់បែបធម្មជាតិ។ ដើមឈើបានបិទបាំងការចូលមកនៃពន្លឺព្រះអាទិត្យ និងកម្តៅចូលមកខាងក្នុងផ្ទះ, អ្នកនឹងមានអារម្មណ៍ថាពុំត្រូវការប្រើប្រាស់ម៉ាស៊ីនត្រជាក់ជាញឹកញាប់ពេកទេក្នុងខែក្តៅនេះ។ ពិតណាស់ម្លប់ដែលផ្តល់ដោយដើមឈើនេះវាអាចកាត់បន្ថយថ្លៃប្រើប្រាស់ម៉ាស៊ីនត្រជាក់ចន្លោះពី ១៥% ទៅ ៥០% ជាប្រចាំឆ្នាំ។ ការដាំដើមឈើ ឬចុល្លព្រឹក្សទាំងឡាយក្នុងទីតាំងដែលអាចផ្តល់ជាម្លប់ និងជួយដល់ការមិនអោយឡើងកម្តៅនៃម៉ាស៊ីនរបស់ម៉ាស៊ីនត្រជាក់នោះនឹងទទួលបានអត្ថប្រយោជន៍បន្ថែម។ នេះក៏ព្រោះដោយសារតែម៉ាស៊ីនត្រជាក់ដែលបានការការពារពីកម្តៅព្រះអាទិត្យគឺមានដំណើរការម៉ាស៊ីនល្អជាងហាលវាលចំកម្តៅថ្ងៃក្តៅតែម្តង។

៣ កាត់បន្ថយហានីភ័យពីគ្រោះទឹកជំនន់

វាគឺល្អក្នុងការស្វែងរកវិធីផ្សេងដែលកាត់បន្ថយហានីភ័យពីការលិចផ្ទះនៅពេលដែលមានភ្លៀងខ្លាំង។ ផ្លូវតែមួយគត់គឺមានតែដាំដើមឈើជុំវិញផ្ទះរបស់អ្នកទេ។ ដើមឈើវាអាចជួយកាត់បន្ថយហានីភ័យដោយមានសណ្ឋានជាការបាំងរាំងរវាងផ្ទះ និងការទន្ទ្រានជ្រាបចូលពីទឹកដែលលិច។ លើសពីនេះទៀតដើមឈើអាចស្រូបយកទឹកមួយផ្នែកធំតាមរយៈឬសរបស់វាហើយបញ្ជូនទឹកភ្លៀងដែលលិចលើសនោះទៅកាន់កន្លែងផ្សេងទៀតចៀសជាងហូរចូលក្នុងផ្ទះរបស់អ្នក។

៤ បង្កើនសោភ័ណភាពទាក់ទាញដល់អ្នកចង់ទិញផ្ទះ

ប្រសិនបើអ្នកកំពុងតែរៀបចំចង់ដាក់លក់ផ្ទះនៅពេលណាមួយ គួរតែដាំដើមឈើពីពេលនេះទៅវានឹងអាចជួយដល់អ្នកនាពេលក្រោយៗ។ អ្នកចង់ទិញផ្ទះមួយភាគធំគឺចូលចិត្តវាលមុខផ្ទះ ឬក្រោយផ្ទះដែលមានបរិយាកាសល្អ មានដើមឈើជាច្រើនព័ទ្ធជុំវិញវា ចៀសជាងទំនេរស្អាតគ្មានអ្វីសោះ។ ជាក់ស្តែងវាលបរិយាកាសល្អ និងមានដើមឈើជាច្រើនអាចធ្វើអោយតម្លៃផ្ទះរបស់អ្នកកើនរហូតទៅដល់ ២០%។

៥ ដើមឈើអាចបង្កើននូវបញ្ញា និងស្មារតី

អ្នកស្រាវជ្រាវបានបង្ហាញថាពេលមនុស្សនៅជិតរុក្ខជាតិច្រើន រួមជាមួយដើមឈើផងដែរ វាអាចជួយបង្កើននូវបញ្ញា និងស្មារតី ដែលប្រសិទ្ធភាពមួយនេះ មានសារៈសំខាន់ណាស់ ជាពិសេសគឺចំពោះកុមារ។ ដូចគ្នានេះដែរបើនៅក្បែរដើមឈើអោយបានច្រើននោះរាល់ភាពស្មុគស្មាញទាំងឡាយអាចត្រូវបានកាត់បន្ថយបានខ្លះ វាថែមទាំងបង្កើនថាមពល និងជម្រុញប្រព័ន្ធភាពសុំា។ ប្រសិនបើកូនៗរបស់អ្នកមានបញ្ហាផ្នែកសតិអារម្មណ៍ (ADHD) គួរតែអោយពួកគេចំណាយពេលច្រើនជាមួយធម្មជាតិ នៅក្បែររុក្ខជាតិដើមឈើ វានឹងជួយអោយអាការៈពួកគេបានប្រសើរជាងមុន។ ប្រសិនបើអ្នកដាំដើមឈើជាច្រើនជុំវិញផ្ទះ អ្នកពុំបាច់ត្រូវទៅកន្លែងមានព្រៃឈើដូចជាការឡើងភ្នំ ក្នុងការចង់បាននូវផ្លូវសតិល្អ និងអត្ថប្រយោជន៍នៃសុខភាពរាងកាយល្អនោះទេ។ ជំនួសមកវិញអ្នក និងគ្រួសារអាចគ្រាន់តែចំណាយពេលជាមួយគ្នានៅទីធ្លាជុំវិញផ្ទះស្រូបយកខ្យល់អាកាសដែលល្អ ដើម្បីធ្វើអោយសុខភាពប្រសើរឡើង ពីដើមឈើដែលមានស្រាប់នៅជុំវិញផ្ទះរបស់លោកអ្នកជាការស្រេច។

៦ ផ្តល់ភាពកក់ក្តៅដល់អ្នកក្នុងរដូវរំហើយ

ក្នុងរដូវរំហើយដើមឈើដែលអ្នកបានដាំជុំវិញផ្ទះវាបានជួយរារាំងខ្យល់យ៉ាងមានប្រសិទ្ធភាព ដោយមិនអោយសភាពត្រជាក់ចូលដល់ក្នុងផ្ទះ។

ប្រភព៖ www.hrltech.com